السياسة رؤية ثم استراتيجيا ثم تطبيقات عملية

بفضل وقفة الدستوري الحر صار الشي هذا الي هو مهم ياسر خاطر يبعد خطر الدمغجة الي تخلي أولادنا إرهابيين يقتلوا في تونس و في الخارج و الأمهات تتشلحط و الدولة تلحلح “بربي سامحونا أولادنا الإرهابيين.“.. . الوقفة عرفتوها ماو ؟؟ الوقفة الي انا مشيت لها و تصورت فيها و برشا من هكا الجماعة الباركين متع سياسة نضالات الصالونات و المحشاشات و الفيسبوك و متع نضال الكافيار شنعوا الدنيا و قالو كيفاش تمشي لوقفة منظمتها عبير موسي... خاطر هوما يعني خير منها يعتبرو أنفسهم... عندهم وجاهة موروثة ما نعرفش منين تخليهم باركين عشرة سنين و البلاد برك عليها بوتليس بالارهاب و بالجمعيات و بالفلوس المفرتة و لا نهار واحد منهم شد قضية متع جمعية و الا متع اغتيال خدمها بجدية متع مسار قانوني من الاول للأخر و ضغط في الشارع... هذا كان ما دبروش حويجة في الاثناء والا طمعوهم ووَلاَو ثانين الركبة لتبييض حمالة الفكر الإرهابي... الوجاهة التاريخية متاعهم عاد يعتقدوا الي هي لازم تخلينا نتبعوهم كان هوما حتى كان هوكا باركين خاملين متواطئين خاطر فقط فرقوا على بعضهم باتيندات الثورية بالعضمة... نتمنى انهم كيف يشوفوا نتيجة الخدمة الصحيحة يحشموا على رواحهم مش لا نرحم لا نخلي رحمة ربي تنزل... و الا يتلهاَو كل واحد بجمعية و الا بقضية و يشدو صحيح كيف الدستوري الحر ووقتها الناس تاقف معاهم...قضية كيف قضية شكري بلعيد هملوها سنوات لا تبعوا لا شافوا.. كان مش جات لجنة الدفاع الي تقوم بعمل هايل... قضية نقض كيف كيف...راقدين و ساعات يتكاو... راهي الشعبية ما هاش شعارات و السياسة مهاش ستاتو فيسبوك و اجتماع في أوتيل و عشاء في دار و تجغجيغ في التلفزة... السياسة رؤية ثم استراتيجيا ثم تطبيقات عملية و خدمة من الصباح للليل... و الي يشوف اجتماع سوسة يفهم الي ما فماش رَوسات أخرى... الي يحب يقعد ينبر من بعيد بش يعطي للناس ولروحو انطباع بالطهرية.. فاتو الترينو...والا مزال كان ترينو واحد كان صدقني ربي 😁

#AmisMoussi